राजकीय घडामोडींच्या पार्श्वभूमीवर उपमुख्यमंत्री अजित दादा पवार राहुरीत : काय बोलणार याचीच चर्चा

राहुरी ( प्रतिनिधी )

राज्याचे उपमुख्यमंत्री आणि राष्ट्रवादी काँग्रेस (अजित पवार गट) पक्षाचे राष्ट्रीय अध्यक्ष अजितदादा पवार हे रविवार दि.

२७ जुलै २०२५ रोजी राहुरी तालुक्याच्या दौऱ्यावर येत असून त्यांच्या हस्ते राहुरी कृषी उत्पन्न बाजार समितीने बांधलेल्या शेतकरी भवन आणि उपहारगृह यांचे लोकार्पण तसेच शेतकरी मेळाव्याचे आयोजन करण्यात आले आहे.

या कार्यक्रमाला उपस्थित राहण्याचे आवाहन , राहुरी बाजार समितीचे उपसभापती बाळासाहेब खुळे यांनी पत्रकाद्वारे केले आहे.

नुकत्याच झालेल्या डॉ. तनपुरे सहकारी साखर कारखान्याच्या निवडणुकीनंतर चेअरमन अरुण तनपुरे यांनी राष्ट्रवादी काँग्रेस (अजित पवार गट) पक्षात प्रवेश केला होता. त्यानंतर आठवड्याभरात तालुक्यातील काही प्रमुख कार्यकर्त्यांसह सुमारे ४०० ते ५०० कार्यकर्ते राष्ट्रवादीत गेले. या वेळी अजित पवार यांनी अहिल्यानगर दौऱ्याचे आश्वासन दिले होते.
रविवारी २७ जुलै रोजी ते राहुरी तालुक्यात येत आहेत. सभापती अरुण तनपुरे यांच्या पक्ष प्रवेशानंतर मध्यंतरीच्या काळात अनेक घडामोडी घडलेल्या आहेत , त्याची जोरदार चर्चाही झाली आहे. त्यामुळे उपमुख्यमंत्री अजित पवार यांच्या अहिल्यानगर जिल्ह्यातील राहुरी येथील दौऱ्याबाबत सर्वांनाच उत्सुकता लागली आहे . डॉ. तनपुरे कारखान्याच्या अडचणींबाबत ते काय भूमिका मांडणार , याकडे सर्वांचे लक्ष लागले आहे. कारखान्याच्या भवितव्यासंदर्भात त्यांच्या भाषणातून काही ठोस निर्णय जाहीर होण्याची शक्यता वर्तवली जात आहे .