रखडलेल्या नगर - मनमाड रस्त्याबाबत खा. निलेश लंके केंद्रीय मंत्री गडकरींच्या भेटीला : रस्त्याचे काम मार्गी लावण्याची ग्वाही

अहिल्यानगर ( प्रतिनिधी )

नगर दक्षिण लोकसभा मतदारसंघातील विविध रस्त्यांची कामे तसेच रखडलेल्या नगर-मनमाड रस्त्याच्या कामा बाबत खा. नीलेश लंके यांनी केंद्रीय रस्ते व महामार्ग वाहतूक मंत्री नितीन गडकरी यांची भेट घेऊन सविस्तर चर्चा केली .

खा.निलेश लंके यांच्या मागण्यांवर सकारात्मक निर्णय घेण्याची ग्वाही मंत्री गडकरी यांनी दिली.

लोकसभा निवडणूकीपूर्वी खा. नीलेश लंके यांनी नगर-मनमाड रस्त्याच्या दुदर्शकडे लक्ष वेधले होते. नगर - पाथर्डी रस्त्याच्या रखडलेल्या कामासाठी त्यांनी नगर येथे उपोषण केल्यानंतर हे काम तात्काळ माग लागले होते . नगर-मनमाड रस्त्याचे कामही मार्गी लावण्याची ग्वाही मंत्री गडकरी यांनी दिली होती. त्यानुसार नगर-मनमाड रस्त्याच्या दुरूस्तीचे काम सध्या सुरू आहे.

नगर-मनमाड रस्त्याच्या कामाची नव्याने निविदा काढण्यात येणार असून ज्या ठिकाणी आवश्यकता आहे तिथे काँक्रीटीकरणाचा रस्ता करण्याची मागणी खा. लंके यांनी केली . मंत्री गडकरी यांनी ती स्विकारली देखिल आहे. या कामाबाबत खा. लंके यांनी मंत्री गडकरी यांच्याकडे काही महत्वपुर्ण बाबीही मांडल्या.

मतदारसंघातील काही रस्त्यांसाठीचे प्रस्तावही खा लंके यांनी या बैठकीत सादर केले. त्या कामांबाबत गडकरी यांनी संबंधित अधिकाऱ्यांना सुचना देत पुढील कार्यवाही करण्यास सांगितल्याचे खा. लंके यांनी सांगितले.

लोकसभेचे हिवाळी अधिवेशन सुरू झाले असून कामकाजाच्या पाहिल्याच दिवशी खा. नीलेश लंके हे कामाला लागले आहेत. इतर विभागासंदर्भातील प्रस्ताव सादर करण्यासाठी खा. लंके हे लवकरच मंत्र्यांची भेट घेणार असल्याचे सांगण्यात आले.