अमेरिकेतील ढगफुटीत राहुरीच्या प्रसिद्ध डॉ. अनुपमा वैद्य यांचा मृत्यू

राहुरी ( प्रतिनिधी )

राहुरीच्या वैद्यकीय क्षेत्रात गोरगरीबांची सेवा करणार्‍या डॉ. अनुपमा वैद्य- चांदोरकर (६२) यांचा ढगफुटी पावसामुळे मृत्यू झाल्याची घटना अमेरिकेत घडली सदर दुःखद घटना समजताच राहुरी सह नगर जिल्ह्यातील वैद्यकीय क्षेत्रात हळहळ व्यक्त करण्यात आली.

डॉ. अनुपमा वैद्य व त्यांचे पती डॉ. अनिरुद्ध वैद्य या दाम्पत्यांनी राहुरीत हजारो रुग्णांची सेवा केलेली आहे.

राहुरी येथील दिवंगत डॉ. अनिरुद्ध वैद्य यांच्या पत्नी डॉ. अनुपमा वैद्य-चांदोरकर (वय ६२) यांचे २१ जुलै २०२५ रोजी अमेरिकेतील कॅन्सस येथील ओव्हरलँड पार्क येथे निधन झाले. त्यांचा अहिल्यानगर आणि अमेरिकेतही मोठा परिवार आहे. त्या राहुरी येथे असताना २००३ मध्ये राहुरी ते नगर रस्त्यावर त्यांच्या वाहनाला अपघात झाला होता. त्यावेळी त्यांना वेळेवर मदत मिळाल्याने अनर्थ टळला होता. या प्रसंगाचीही त्यांच्या स्नेहीजणांनी आठवण सांगितली.अमेरिकेत ईशान्य कॅन्ससमधील जॉन्सन कंट्री येथे आपल्या मुलीकडे वैद्य गेल्या अनेक वर्षांपासून राहत होत्या. सकाळी त्या पायी फिरायला जात. सोमवारी सकाळी दक्षिण ओव्हरलँड पार्कच्या ट्रेलवरून चालत असताना अचानक ढगफुटीसारखा पाऊस झाला. तेथील नाल्याला पूर आला. त्यात बुडून त्यांचा मृत्यू झाला. त्या फिरून लवकर घरी न आल्याने त्यांच्या मुलीने पोलिसांना कळविले. पोलिसांनी शोध घेतल्यावर ही घटना उघडकीस आली, अशी माहिती ओव्हरलँड पार्क पोलिस विभागाचे प्रवक्ते जॉन लेसी यांनी दिली. त्यांच्यामागे दोन मुली, डॉ. अदिती आणि प्रीती, जावई, धनंजय आणि सौमित्र, नातवंडे, आयुष, मायरा आणि ध्रुव असा परिवार आहे. तसेच भारत आणि अमेरिकेतील कुटुंबातील सदस्य आणि मित्र असा मोठा परिवार आहे

ही बातमी कळाल्यानंतर जलसंपदा विभागातील सेवानिवृत्त कार्यकारी अभियंता जयप्रकाश संचेती यांनी २००३ मधील एका प्रसंगाची आठवण सांगितली. त्यावेळी वैद्य राहुरीत राहत होत्या. त्या त्यांच्या वाहनातून नगरकडे येत असताना एमआयडीसीजवळ अपघात झाला. त्यावेळी संचेती त्यांच्या सहकार्‍यांसह सरकारी वाहनातून राहुरीकडे जात होते. अपघात पाहून ते थांबले. त्यांनी व चालकाने मदत करून वैद्य यांना त्यांच्या सरकारी वाहनातून नगरच्या रुग्णायात दाखल केले होते. त्यानंतर त्यांना वैद्य यांच्याबद्दल माहिती मिळाली. पुढे संचेती आणि वैद्य यांच्या परिवाराचा स्नेह निर्माण झाला होता. आज जेव्हा वैद्य यांच्या मृत्यूची बातमी कळाली, तेव्हा संचेती यांना त्या प्रसंगाची आठवण झाली.

-------

अनुपमा वैद्य यांचा अल्प परिचय

-------

अहिल्यानगरमधील प्रख्यात शिक्षक गणेश आणि सविता चांदोरकर यांच्या कन्या डॉ. अनुपमा वैद्य यांचा जन्म अहमदनगर (आताचे अहिल्यानगर) शहरात झाला. त्यांनी त्यांचे सुरुवातीचे शिक्षण शहरातील सेक्रेड हार्ट कॉन्व्हेंटमधून घेतले. मुंबईतील सरकारी दंत महाविद्यालयातून दंतचिकित्सक पदवी प्राप्त केली. त्यानंतर त्यांचे सहकारी दंतवैद्य डॉ. अनिरुद्ध वैद्य यांच्याशी लग्न केले. त्या दोघांनी राहुरीच्या ग्रामीण भागात हजारो लोकांची सेवा केली. मुंबईतील एक फायदेशीर दंतवैद्यकीय कारकीर्द सोडून राहुरीत येत पती-पत्नी जोडीने त्यांचे संपूर्ण आयुष्य गरीब आणि गरजूंच्या सेवेसाठी समर्पित केले. काही वर्षांपासून त्या अमेरिकेत राहत होत्या .