स्वाभिमानी शेतकरी संघटनेला खिंडार : अहिल्यानगर जिल्ह्यातील हा शेतकरी नेता शिवसेनेत ( शिंदे गट ) दाखल

राहुरी ( प्रतिनिधी )

स्वाभिमानी शेतकरी संघटनेचे जिल्हाध्यक्ष रवींद्र मोरे यांनी संघटनेला सोडचिठ्ठी देत मंगळवारी उपमुख्यमंत्री एकनाथ शिंदे यांच्या उपस्थितीत शेकडो कार्यकर्त्यांसह शिवसेना ( शिंदे गट ) मध्ये प्रवेश केला.

या प्रवेशामुळे राजू शेट्टी यांच्या नेतृत्वाखालील स्वाभिमानी शेतकरी संघटनेला अहिल्यानगर जिल्ह्यामध्ये मोठा धक्का बसला आहे .

या प्रवेशादरम्यान मोरे यांची पश्चिम महाराष्ट्र शेतकरी सेना उपाध्यक्ष पदी नियुक्ती करण्यात आली. मोरे हे केवळ जिल्हाध्यक्ष असताना ऊसदर, वीजदर, हमीभाव आणि दुष्काळी मदत यांसारख्या मुद्द्यांवर त्यांनी अनेक आंदोलने केली आहेत . त्यांच्या या नेतृत्वामुळे जिल्ह्यात स्वाभिमानी शेतकरी संघटनेला मोठी ताकद मिळाली होती. मात्र, स्थानिक स्वराज्य संस्थांच्या निवडणुका तोंडावर असतानाच त्यांनी राजू शेट्टींचा हात सोडून शिवसेनेचा भगवा हाती घेतल्याने राजकीय वर्तुळात अनेक चर्चांना उधाण आले आहे . या प्रवेशाच्या वेळी त्यांचे समर्थक मोठ्या संख्येने उपस्थित होते.

या प्रवेशानंतर अहिल्यानगर जिल्ह्यातील राजकीय समीकरणे बदलण्याची चिन्हे आहेत . एका बाजूला स्वाभिमानी शेतकरी संघटना तर दुसऱ्या बाजूला रवींद्र मोरे यांच्या पक्ष प्रवेशामुळे शिवसेन ( शिंदे गट ) जिल्ह्यात अधिक मजबूत होण्याची शक्यता आहे.