“ लोकप्रतिनिधींच्या उंच उड्डाणांनी जमिनीवरील जाणीवा कुठे हरवल्या? ”
विशेष लेख - श्रेयश लोळगे ( यूवा पत्रकार )
परंपरेनुसार महाराष्ट्र विधानसभेचे हिवाळी अधिवेशन राज्याची उपराजधानी नागपूर येथे ८ डिसेंबर ते १४ डिसेंबर २०२५ दरम्यान आयोजित करण्यात आले आहे. राज्यातील महत्त्वाच्या प्रश्नांवर चर्चा व्हावी, लोकांचे प्रश्न मार्गी लागावेत यासाठी भरवली जाणारी ही अधिवेशने म्हणजे लोकशाहीची खरी परीक्षा.
परंतु याच अधिवेशनाच्या पहिल्या टप्प्यातच काही वेगळे चित्र पाहायला मिळाले—ते म्हणजे आमदार आणि मंत्र्यांच्या ‘प्रायव्हेट जेट’ आणि ‘प्रायव्हेट हेलिकॉप्टर’मधून होणाऱ्या आगमनांचे.
मिळालेल्या माहितीनुसार एका प्रायव्हेट जेटचे भाडे .... आहे. लोकांच्या करातून चालणाऱ्या या लोकशाहीतील लोकप्रतिनिधींचे इतके भव्यदिव्य उड्डाण—ही प्रतिष्ठेची शर्यत आहे की जनतेपासून दूर जाण्याची पायरी? सार्वजनिक पैशातून मिळणाऱ्या पगार-भत्त्यांचा लाभ घेऊन जनतेचीच तिजोरी रिकामी करणाऱ्या अशा विलासी प्रवासाने नेमका कोणता संदेश दिला जातो, हा प्रश्न उपस्थित होतो.
या पार्श्वभूमीवर स्वर्गीय गणपतराव देशमुख (सांगोला) यांचे नाव आदराने आठवावेच लागते. तब्बल अकरा वेळा निवडूनही त्यांनी कधीच सत्तेचे दर्प वा पैशांचे आकर्षण जवळ केले नाही. सरकारकडून मिळालेला आमदारकीचा पगार त्यांनी स्वतःसाठी नव्हे, तर आपल्या मतदारसंघातील गरीब, गरजू आणि विकासकामांसाठी वापरला. त्यांचे नेतेपण हे खुर्चीपेक्षा माणसांशी असलेल्या नात्यात होते. त्यांच्या हातात सत्ता होती, पण ती सत्तेची नाही तर सेवेची होती.
आजचे चित्र मात्र अगदी उलट दिसते. पैशांची अफरातफर, ठेकेदारांकडून होणारे व्यवहार, सत्तेच्या नादी लागलेली स्पर्धा—या सगळ्यात कर्तव्याची जाणीव, माणुसकी, साधेपणा आणि जनतेप्रती असलेली तळमळ कुठेतरी हरवली आहे. राजकारणात सेवाभाव कमी होत चालला आहे आणि वैभव हा नवा मापदंड बनत आहे.
एसटीमध्ये आमदार-खासदारांसाठी राखीव जागा असते, पण त्या जागेवर बसणारा लोकप्रतिनिधी आता दुर्मिळच. गणपतराव देशमुख हे मात्र शेवटपर्यंत अपवाद ठरले. साधेपणाने, लोकांमध्ये मिसळून, त्यांच्याच सोयीच्या साधनांतून प्रवास करणारे ते आजच्या पिढीतील नेत्यांसाठी आदर्श होते आणि राहतील.
आज गरज आहे एका प्रश्नाची—
जनतेच्या पैशातून जगणारे लोकप्रतिनिधी जनतेपासून दुरावत का चालले आहेत?
हिवाळी अधिवेशनाला प्रायव्हेट जेटची शान आवश्यक आहे की लोकांच्या प्रश्नांची जाण?
लोकप्रतिनिधींनी उंच उड्डाणे घ्यावी, त्यात काही वावगे नाही; पण ती उड्डाणे जनतेच्या विश्वासापासून दूर नेणारी नसावीत.
गणपतराव देशमुखांसारखी सेवेची परंपरा अजूनही कालबाह्य झालेली नाही—ती पुढे नेण्याची जबाबदारी आजच्या आमदार-खासदारांवर आहे.
सत्तेपेक्षा समर्पण, पदापेक्षा प्रामाणिकपणा आणि वैभवापेक्षा विनम्रता अधिक महत्त्वाची आहे—हे पुन्हा एकदा स्मरणात ठेवण्याची हीच योग्य वेळ आहे.
श्रेयस लोळगे (8149999955)
(युवा पत्रकार)
Post a Comment
0 Comments